Ozal habar berşimiz ýaly, Türkmenistanyň Garaşsyzlygynyň 35 ýyllyk toýunyň hormatyna 35 sany ahalteke bedewine atlanan ýigitler ýurduň ähli welaýatlaryna hem-de Aşgabat we Arkadag şäherlerine wekilçilik edip, kesgitlenen menzilleri geçýärler. 12-nji noýabrda ýurduň Lebap welaýatynda badalga berlen «Amul — Hazar» atly ýörişiniň üçünji gününde ýörişe gatnaşyjylar Mary welaýatyna geldiler. Bu barada «Türkmenistan» gazetinde habar berildi. Ýörişe gatnaşýan atlaryň ýagdaýy yzygiderli gözegçilikde saklanýar. Şeýlelikde, 14-nji noýabrda «Amul — Hazar» atly ýörişine gatnaşyjy atlylarymyz Mary welaýatynyň çägine girdiler. Gadymy Mary topragynda atly ýörişe gatnaşyjylar ýollaryny dowam edip, welaýatyň Baýramaly etrabynyň Bagtyýarlyk şäherçesiniň golaýynda gurnalan 2-nji düşelgä bardylar. 15-nji noýabrda bolsa atly ýörişe gatnaşyjylar «Gadymy Merw» döwlet taryhy-medeni goraghanasynda düşlediler. Ýeri gelende bellesek, atly ýöriş üçin kesgitlenilen umumy geçilmeli aralyk 1 müň 755 kilometrdir. Şonuň 108 kilometri Lebap, 461 kilometri Mary, 473 kilometri Ahal, 33 kilometri Daşoguz, 680 kilometri bolsa Balkan welaýatynyň çäginden geçer.

Täzelikler, Ata Watan tarapyndan 12 hours ago
Teswir ýazmak üçin Içeri gir→