Russiýanyň milli ýygyndysy Daşkentde geçirilen ýoldaşlyk duşuşygynda Özbegistanyň ýygyndysyny 3:2 hasabynda ýeňdi. Duşuşyk «Pahtakor» stadionynda geçirildi. Duşuşygyň 5-nji minutynda öz derwezesine gol geçiren Wiktor Melehin ýer eýelerini öňe çykardy. Ikinji ýarymyň başynda Behruz Karimow özbek toparynyň artykmaçlygyny iki gola ýetirdi. Duşuşygyň 70-nji minutynda Nikolaý Komliçenko hasap tapawudyny azaltdy, bäş minutdan soň bolsa ikinji goluny geçirip, hasaby deňledi. 79-njy minutda Alekseý Mirançuk Russiýanyň ýygyndysyna ýeňiş getiren goly geçirdi. Komliçenko bilen Mirançuk duşuşygyň ikinji ýarymynda ätiýaçdaky oýunçylaryň hataryndan meýdança çykdylar. Russiýanyň ýygyndysy 2026-njy ýylda ýoldaşlyk duşuşyklarynda altynjy ýeňşini gazandy. Mundan ozal Russiýanyň futbolçylary Nikaraguanyň (3:1), Burkina-Fasonyň (3:0), Trinidad we Tobagonyň (3:0), Eýranyň (2:0) hem-de Namibiýanyň (6:0) ýygyndylaryndan üstün çykypdylar. Mundan başga-da, olar Mali (0:0) we Nigeriýa (3:3) bilen deňme-deň oýnadylar, Müsüriň ýygyndysyndan bolsa 0:1 hasabynda ýeňildiler. Russiýanyň milli ýygyndysy indiki duşuşygyny 17-nji noýabrda Krasnodar şäherinde Wenesuelanyň ýygyndysyna garşy geçirer.