Ozal habar berşimiz ýaly, türkmenistanly mekdep okuwçylar Özbegistanda geçirilen Abu Reýhan Biruny adyndaky III Halkara himiýa olimpiadasynda üstünlikli çykyş etdiler. Olimpiadanyň resmi saýtynda berilýän habara görä, Türkmenistanyň wekilleri 1 altyn, 2 kümüş we 1 bürünç medala mynasyp boldular. Hususan-da, türkmenistanly mekdep okuwçylardan Pälwan Ilmämmedow altyn, Myrat Didarow we Maksat Tyllaýew kümüş, Jennet Şadurdyýewa bürünç medaly eýeledi. Ýeri gelende olimpada Türkmenistandan 4 okuwçynyň gatnaşyp, olaryň ählisiniň baýrakly orunlara mynasyp bolandygyny aýratyn nygtamak gerek. 3 — 10-njy noýabr aralygynda geçirilen halkara olimpiadada Azerbaýjan, Kosta-Rika, Gruziýa, Ysraýyl, Iordaniýa, Gazagystan, Gyrgyzystan, Malaýziýa, Mongoliýa, Katar, Russiýa, Saud Arabystany, Täjigistan, Tailand, Türkiýe, Türkmenistan we Özbegistan ýaly ýurtlardan 108 sany mekdep okuwçy özara bäsleşdi. Olimpiadanyň jemleri boýunça gatnaşyjylar 13 altyn, 25 kümüş we 37 bürünç medala mynasyp boldular.