Türkmenistanyň Saud Arabystany Patyşalygyndaky Adatdan daşary we Doly ygtyýarly ilçisi Muhammetgeldi Aýazow bilen «Expo 2030 Riyadh» sergisiniň halkara gatnaşyjylar departamentiniň direktory, öňde boljak Bütindünýä sergisinde Türkmenistanyň ýurt boýunça utgaşdyryjysy bolup durýan Muhammet bin Garadyň arasynda duşuşyk geçirildi. Bu barada Türkmenistanyň DIM-niň resmi saýtynda habar berildi. Duşuşygyň dowamynda Muhammet bin Garad Türkmenistanyň «Expo 2030 Riyadh» halkara sergisine gatnaşjakdygyny resmi taýdan ilkinji bolup tassyk eden ýurtlaryň hatarynda bolandygy üçin minnetdarlyk bildirdi. Habarda bellenilişi ýaly, duşuşykda taraplar Türkmenistanyň milli ekspozisiýasyny taýýarlamak bilen bagly meseleleri, şeýle hem ýurduň sergä resmi gatnaşyjy hökmünde gatnaşmagy baradaky ylalaşyga gol çekmek dabarasyny geçirmek bilen bagly guramaçylyk meselelerini ara alyp maslahatlaşdylar. M.Aýazow Türkmenistanyň agzalan Bütindünýä sergisine gatnaşmagynyň ýurduň Milan, Astana, Dubaý we Osaka şäherlerinde geçirilen iri halkara sergilerinde gazanan üstünliklerini tanyşdyrmak boýunça alyp barýan yzygiderli işleriniň dowamy boljakdygyny belledi.